کراچی (ایچ آراین ڈبلیو) ڈی ڈیفنس خیابان نشاط میں دو گروپوں میں تصادم، اکبر بگٹی کے بھتیجے سمیت 5 افراد جاں بحق، کراچی کے علاقے ڈیفنس خیابان نشاط میں دو گروپوں میں فائرنگ کا تبادلہ ہوا جس کے نتیجے میں 5 افراد جاں بحق اور 2 زخمی ہوگئے۔ پولیس کے مطابق فہد بگٹی گروپ اور علی حیدر بگٹی گروپ کے درمیان فائرنگ ذاتی جھگڑے کی بنا پر ہوئی ہے۔ پولیس کا کہنا ہے کہ فائرنگ سے ایک گروپ کے تین اور دوسرے گروپ کے دو افراد جاں بحق ہوئے ہیں، تمام زخمی اور مارے گئے افراد آپس میں کزن ہیں۔ پولیس کے مطابق دونوں گروپوں کا تعلق نوابزادہ اکبر بگٹی کے خاندان سے ہے، جاں بحق افراد میں نوابزادہ اکبر بگٹی کا بھتیجا اور بھانجا بھی شامل ہے۔ اسپتال انتظامیہ کے مطابق مرنے والوں میں میر میثم بگٹی، میر عیسیٰ بگٹی، علی، فہد اور نصیب اللّٰہ شامل ہیں جبکہ زخمی میر علی حیدر بگٹی اور قائم علی کا علاج جاری ہے۔ وزیر داخلہ سندھ نے ایڈیشنل آئی جی سے واقعے کی تفصیلات طلب کرلی ہیں۔ وزیر داخلہ ضیاء الحسن لنجار نے کہا کہ مسلح تصادم میں ملوث عناصر کے خلاف قانونی کاروائی کو یقینی بنایا جائے۔ کسی کو بھی ہر گز اجازت نہیں کہ وہ شہر میں قیام امن جیسے اقدامات کو نقصان پہنچائیں۔
