کراچی (ایچ آر این ڈبلیو) کراچی میں ٹماٹر کے آسمان چھوتے نرخوں نے شہریوں کے چہرے لال کردیے ہیں. ایران سے ٹماٹر پاکستان آنے کے باوجود ٹماٹر تین سو سے چار سو روپے فی کلو میں فروخت کیا جارہا ہے دیگر سبزیاں بھی شہریوں کی قوت خرید سے باہر ہیں۔ سبزی منڈی میں ٹماٹر کی قیمت ایک جگہ برقرار ہے تاہم متوسط علاقوں میں ٹماٹر 300 روپے جبکہ پوش علاقوں میں 400 روپے تک فروخت ہورہا ہے.ٹماٹر کے علاوہ پیاز، آلو، مٹر، بھنڈیاں اور دیگر سبزیاں بھی من مانی قیمت پر فروخت ہورہی ہیں، پیاز 80 تا 100روپے کلو، آلو 50روپے ، بھنڈی 120تا 140روپے، مٹر 200روپے ، اروی، توری، ٹنڈے 120روپے، پالک 60روپے، شلجم، چقندر، گوبھی 100روپے جبکہ کھیرا70 سے 80روپے کلو میں فروخت کیا جارہا ہے. مہنگائی کے ستائے عوام کلو کے بجائے ایک پاﺅ ٹماٹر خرید رہے ہیں، سبزی فروش کم مقدار میں ٹماٹر خریدنے والوں سے اور بھی زیادہ قیمت وصول کرتے ہیں۔ درآمد کنندگان کا کہنا ہے کہ ایران سے 4500ٹن ٹماٹر کی درآمد کے سودے کیے ہیں اب تک 989ٹن ٹماٹر پاکستان پہنچ چکا ہے تاہم ایران میں پیٹرول کی قیمتوں پر احتجاج کی وجہ سے ٹماٹر کی ترسیل متاثر ہونے اور تاخیر کا خدشہ ہے۔ آل پاکستان فروٹ اینڈ ویجیٹل ایکسپورٹرز ایسوسی ایشن کے سرپرست اعلیٰ وحید احمد کے مطابق کراچی میں ٹماٹر کی یومیہ کھپت 20 ٹن کے لگ بھگ ہے کراچی کی یومیہ طلب پوری کرنے کے لیے 40 سے 50ٹرک ٹماٹر کی ضرورت ہے اتنی وافر مقدار میں بلاتعطل ترسیل ہونے تک ٹماٹر کی قیمت مناسب سطح پر نہیں آسکتی۔
