کراچی (ایچ آراین ڈبلیو) متحدہ قومی موومنٹ پاکستان کے سابق رکن قومی اسمبلی شہید علی رضا عابدی کی پہلی برسی آج انتہائی عقیدت اور احترام کے ساتھ منائی گئی شہید کی برسی مقامی امام بارگاہ میں منعقد ہوئی جہاں قرآن خوانی و فاتحہ خوانی کی گئی بر سی میں ایم کیو ایم پاکستان کے سینئر ڈپٹی کنوینر عامرخان،ڈپٹی کنوینر کنور نوید جمیل، رکن رابطہ کمیٹی فیصل سبزواری،سابق و موجودہ اراکین اسمبلی،سی او سی کے ذمہ داران اور کار کنان نے شرکت کی۔ اس موقع پر عامر خان نے شہید علی رضا عابدی کی خدمات کو زبردست خراج عقیدت پیش کرتے ہوئے کہا کہ شہید علی رضا عابدی نے ایم کیو ایم پاکستان کی جدو جہد کیلئے جو کارہائے نمایاں انجام دئے وہ ایک سنہرا باب ہے وہ ہمیشہ عوام میں رہ کر نا صرف ایم کیو ایم کے پیغام کو عام کرتے رہے بلکہ قومی اسمبلی اور سوشل میڈیا پر بھی متحرک کردار ادا کر تے رہے انکی خدمات کو ہم کبھی فراموش نہیں کر سکتے علی رضا عابدی کا نقصان ایک ایسا نقصان ہے جسکی تلافی ممکن نہیں انکی شہادت سے ایم کیو ایم پاکستان ایک مخلص کارکن سے محروم ہوئی۔
