لاہور (ایچ آراین ڈبلیو) قومی ایئرلائن کی فضائی میزبان سونے کے زیورات اسمگل کرتے ہوئے پکڑی گئی ، جس کے بعد فضائی میزبان کو 3دن کیلئےمعطل کردیاگیا جبکہ 1ماہ تک بین الاقوامی پرواز پر بھی پابندی عائد کردی ہے۔
تفصیلات کے مطابق لاہور ائیرپورٹ پر پی آئی اے ویجلنس نے کارروائی کرتے ہوئے قومی ائیرلائن کی فضائی میزبان کو سونے کے زیورات اسمگل کرتے پکڑلیا، بینش سلیم کو لندن جاتے ہوئے پکڑا گیا ، وہ سونے کی چوڑیاں اسمگل کررہی تھی۔
ذرائع ایئرپورٹ کا کہنا ہے کہ فضائی میزبان کوفلائٹ سےآف لوڈکردیاگیا وہ پی آئی اےکی پروازپی کے757پر ڈیوٹی پرتھی ، ڈیوٹی کےدوران فضائی میزبان زیورات نہیں لے جاسکتی۔
ترجمان پی آئی اے کا کہنا ہے کہ خاتون اہلکار تین روز کیلئے معطل کر دیا ہے اور بین الاقوامی پروازوں پر ایک ماہ کی پابندی لگا دی گئی ہے، خاتون پیپلز یونٹی کےجوائنٹ سیکرٹری علی عثمان کی اہلیہ ہیں۔
یاد رہے گذشتہ سال ستمبر میں پی آئی اے یونیفارم میں ملبوس فضائی میزبانوں کی ویڈیو سوشل میڈیا پر وائرل ہونے کے بعد انتظامیہ نے ان کیخلاف کارروائی کرتے ہوئے تینوں فضائی میزبانوں کو بین الاقوامی فلائٹس سے گراونڈ کردیا تھا۔
