لاہور (ایچ آراین ڈبلیو) پنجاب پولیس نے اہلکاروں کے ”ٹک ٹاک“ استعمال کرنے پر پابندی عائد کردی ہے۔ایک نجی ٹی وی کی رپورٹ کے مطابق وزیر اعظم سٹیزن پورٹل پر دوران ڈیوٹی پولیس اہلکاروں کے ٹک ٹاک استعمال کی شکایتیں درج کروائی گئیں جس پر پنجاب پولیس نے پابندی کا فیصلہ کیا۔اے آئی جی آپریشنز کی جانب سے پنجاب بھر کے تمام آر پی اوز کو مراسلہ جاری کردیا گیا ہے جس کے مطابق دوران ڈیوٹی اہلکار ٹک ٹاک کا استعمال نہیں کریں گے۔مراسلہ کے مطابق یہ طرز عمل سوشل میڈیا پر محکمہ پولیس کے وقار کو مجروح کرتا ہے، احکامات کی عدم تعمیل کی صورت میں سخت کارروائی کی جاسکتی ہے۔خیال رہے کہ فحش مواد کے پھیلاؤ پر ٹک ٹاک پر ملک بھر میں متعدد بار پابندی لگائی جا چکی ہے۔ گزشتہ سال 19 نومبر کو پی ٹی اے نے ٹک ٹاک کو بحال کرنے کا اعلان کیا تھا۔پی ٹی اے نے ٹک ٹاک انتظامیہ کی غیر اخلاقی مواد کنٹرول کرنے اور ویڈیوز ہٹانے کی یقین دہانی پر ٹک ٹاک بحال کرنے کے احکامات جاری کیے تھے۔
